O Maria Virgo Pia

O María, Virgo pia,
Mater admirábilis;
Per te Deus, judex meus,
Mihi sit placábilis.

Commendáre me dignáre,
Christo, tuo Fílio;
Ut non cadam, sed evádam
De mundi naufrágio.

Pro me pete, ut quiéte,
Sempitérna pérfruar;
Ne torméntis comburéntis
Stagni miser óbruar.

Esto tutrix et adjútrix
Christiáni pópuli;
Pacem praésta, ne molésta
Nos pertúrbent saéculi.

Salve Mater

Salve máter misericórdiæ,
Máter Déi, et máter véniæ,
Máter spéi, et máter grátiæ,
máter pléna sanctæ lætítiæ.
O María!

Sálve, décus humáni géneris,
Sálve Vírgo dígnior céteris,
Quæ vírgines ómnes transgréderis,
et áltius sédes in súperis,
O María!

Sálve félix Vírgo puérpera:
Nam qui sédet in Pátris déxtera,
Caélum régens, térram et aéthera,
Intrá túa se cláusit víscera,
O María!

Te creávit Páter ingénitus,
Adamávit te Unigénitus,
Fecundávit te sánctus Spíritus,
Tu és fácta tóta divínitus,
O María!

Te creávit Déus mirábilem,
Te respéxit ancíllam húmilem,
Te quæsívit spónsam amábilem,
Tíbi múmquam fécit consímilem,
O María!

Te beátam laudáre cúpiunt
Omnes jústi, sed non suffíciunt;
Múltas láudes de te concípiunt,
Sed in íllis prórsus defíciunt,
O Mária!

Esto, Máter, nóstrum solátium;
Nóstrum ésto, tu Vírgo, gáudium;
Et nos tándem post hoc exsílium,
Laétos júnge chóris cæléstium,
O Mária!